उर्लाबारी-३ मंगलबारेस्थित मदन भण्डारी कलेज अफ ईन्जिनियरिङको आयोजनामा आईतबारदेखी आगमन २.० कार्यक्रम सुरु भएको छ । आज एक कार्यक्रमबिच मदन भण्डारी स्मृती प्रतिष्ठान नेपालका अध्यक्ष रोमनाथ ओलीले रोवर्टको माध्यमबाट रिवन काटेर कार्यक्रमको उद्घाटन गरेका छन् ।

आगमन २.० नाम दिईएको सो कार्यक्रम ईन्जिनियरिङ,  वास्तुकला तथा प्रविधिको अन्वेषण यात्रा भन्ने मूल नाराका साथ आयोजना गरिएको कार्यक्रमका संयोजक अनुभव पोखरेलले जानकारी दिए । उनकाअनुसार वृहत विज्ञान प्रविधि र वास्तुकला प्रदर्शनी कार्यक्रमको पहिलो दिनमा २ हजार बढिको उपस्थिती रहेको थियो ।

आईतबार र सोमबार प्रतिष्ठानको कलेज अफ ईन्जिनियरिङमा आयोजना हुने वृहत विज्ञानप्रविधि र वास्तुकला प्रदर्शनीमा झापा, मोरङ र सुनसरीका करिव १ सय ५० वटा प्लस टु साईन्स र टेक्निकल कलेजहरुका ६ हजार विद्यार्थीको सहभागीता रहने बताईएको छ ।

यस्तै सो कार्यक्रमले विद्यार्थीहरूको सिर्जनशीलता, नवीनता र ज्ञान आदान-प्रदानका लागि उत्कृष्ट मञ्च प्रदान गर्ने अपेक्षा गरिएको प्रतिष्ठानका कार्यकारी निर्देशक प्रा. विनोद अर्यालले बताएका छन्।

सो कार्यक्रममा विद्यार्थीहरुले आर्किटेक्चर, सिभिल, कम्प्युटर , आईटी , कृषीलगायतका विज्ञान प्रविधि र वास्तुकलाका विभिन्न मोडलहरु प्रदर्शनीमा राखिएको  थियो।

यस्तै सो अवसरमा विद्यार्थीहरुबिच लाईभ पेपर ब्रिज  र लाईभ आर्ट प्रतिश्पर्धा समेत आयोजना गरिएको थियो ।

पेपर ब्रिज प्रतियोगितामा मेचीनगर बहुप्राविधिक शिक्षालय,  झापा उत्कृष्ठ भएको छ । यस्तै लाईभ आर्टको नतिजा भने सोमबार मात्रै प्रकाशन गरिने कार्यक्रम संयोजक पोखरेलले बताए ।

यस्तै सोमबार विद्यार्थीहरुबिच रोवो रेस र वेवाथन प्रतिश्पर्धा गराईने बताईएको छ । त्यस्तैगरि उल्लेखित स्पर्धाहरुमा उत्कृष्ठ हुने विद्यार्थीलाई मंगलबार एक कार्यक्रमबिच पुरस्कार वितरण गरिने जनाईएको छ ।

पढाईका अलवा विद्यार्थीहरुको क्षमता अभिवृद्धि र सिकाईको स्तर बढाउने लक्ष्यले आयोजित सो कार्यक्रमको नि:शुल्क अवलोकन गर्न सकिने बताईएको छ।

प्रतिष्ठानको कलेज अफ ईन्जिनियरिङको आयोजनामा गत वर्ष समेत वृहत विज्ञानप्रविधि र वास्तुकला प्रदर्शनी कार्यक्रम सम्पन्न भएको थियो ।